Идејата за Млади економски умови (Young Economic Minds) се роди во клупите на Економскиот факултет – Скопје, УКИМ каде низ дебата беше артикулирана потребата за создавање на можност на младите економисти да ги споделуваат своите трудови, размислувања и истражувања со цел градење на една мрежа од млади истражувачи кои ќе помогнат во креирањето на успешни економски политики и поттикнување на економскиот развој во државата. Идејата набрзо прерасна во иницијатива од страна на неколку студенти и професорот Борче Треновски, при што беше прифатен предизвикот  за креирање на веб-порталот Young Economic Minds (YEM).

YEM всушност претставува платформа преку која младите економисти добиваат можност за споделување на своите мисли и  идеи, кои преточени во научни статии, анализи и истражувања ќе бидат споделени со јавноста. Ова би им помогнало да ја развијат и канализираат својата критичка мисла, да почнат да се вклучуваат во економските научни кругови и да бидат вклучени во дизајнирањето на идните економски промени. Освен тоа, YEM се залага за зголемена економска и финансиска писменост на младите како и доближување на комплексните и сложени економски варијабли и феномени до сите млади лица.

Со мотото КАПИТАЛИЗИРАЈ НА ЗНАЕЊЕ ние сакаме да им помогнеме на сите млади умови, брзо и едноставно, по пат на заемно споделување на идеи, информации, публикации да дојдат до знаења кои ќе им бидат особено важни за стартување на кариерата, применување на стекнатите знаења и иницирање на промени со цел создавање на подобро општество за сите.